2016/01/20

العشم مات

العشم مات .. ايوة العشم مات والعشرة هانت
 وكل ذكرى بقت رخيصة عند الناس ..
مكنتش اتصور ابدا تكون هى دى اخرة العشرة واخرة الحب واخر المطاف ..
اخترت الانفصال .. بكامل ارادتك ومن جواك .. كنت مستنيها .. معرفش ليه ..
عدينا حاجات كتيير صعبة ولو نسيت  انا مش بنسى ..
احنا بشر .. وبنغلط .. وبنسامح بعض .. علشان الحياة تستمر ..
وعلشان اللى بيسامحوا بعض .. بالنسبالهم فكرة الانفصال دى مستحيلة .. مستحيل يقتلوا الحب والعشرة كده ببساطة
مجاتش اصلا على بالهم ..
مغلطناش غلطات لا تغتفر ... زى الخيانة والغدر مثلا ..
كل المشاكل كانت تافهة .. وكانت حلولك هى  الانفصال  ..
لو ده قرارك علشان مش متفاهمين .. فكان المفروض اقرره من زمااان بس صبرت وقلت اللى يصبر ينول ..
قلت اللى يستحمل الظروف ويكافح ويقف قصاد البشر ويعدى كل حاجة زى ماتيجي .. وارضى بأقل حاجة علشان نكمل ..
فى الاخر القرار ده يكون منك انت بعد كل ده ..
قلبك وضميرك طاوعوك انك تقتل قلب بيحبك .. كل مشكلة يكون البعد هو الحل !
اكيد فى مرة هتختار البعد .. ومش هتلاقيني ...
القسوة بتعلم الجفـــا .. واللى تهون عليه .. كتيـــــــــــــــر .. اكيد فى مرة هيهون عليك ..
بس هتكون بلا رجـعــة ..
من اول يوم خطوبة وعارفين المشاكل اللى هتواجهنا وقررنا نكمل ..
كمية مشاكل لحد ما حاربنا ورضينا بكل حاجة متاحة وخلاص .. علشان نتجوز ..
 وكل الناس قالوا استنوا .. اصبروا الظروف تبقى احسن ...
واحنا عافرنا وكملنا .. ورضينا ..  وبعدها رضيت بالظروف الصعبة .. بس ملقيتش اللى يرضى معايا ..
لقيت نفسي لوحدى .. بعد كام شهر .. لقيت نفسي بفكر لوحدى فى حالنا .. وازاى نصلحه
وبستحمله .. لقيت نفسي انا بس اللى عايزة اعافر واكمل ..
مع وجود مشاكل .. مش هنكر ان الضغط ده اكيد بيخليني اتخانق على حاجات تانية ممكن تكون تافهة ..
بس فين ومين اللى يستحمل .. اللى استحملته كتير من حقى انه يستحملنى ..
*كان نفسى فى بيت واسرة وحياة .. كان نفسي فى بيبى منك يكون شبهك وحرمتنى منه ودلوقت عرفت السبب ..
كان نفسي فى استقرار وأمان وحب ... ومكانش فى اى حاجة منهم ..

وقراره يكون الانفصال .. علشان مشكلة تافهة ملهاش اى علاقة بالحياة والعيشة الزوجية ..ولا بتحمل المسئولية ..
لقيت نفسي  فجأة اترميت ورجعت حياة العزوبية ..  واحدة واحدة بقيت بقول خلاص مفيش رجوع .. خلاص كفاية
خلاص براحته .. خلاص تعبت .. خلاص مش عايزاه ..
خلتنى قادرة انى اقبل بالوضع .. بعد ما كان بالنسبالى مستحييييييييييل ابعد عنك .. مستحيل يوم ابات بعيد عنك ..
مستحيل اى فكرة بعد او فراق ..
دلوقت خلاص قابلاها .. وبعد ما عافرنا وتعبنا علشان يبقى بيننا ورقة ...
 دلوقت كمان مستنية منك ورقة ..


2015/07/02

مات خلاص

اطمنتله وارتاحتله .. وقالها انه حبها 
سلمتله حبها وقلبها وعقلها ..
 كانت الدنيا ف عينيها..
جنة راسمها لها ..
قرب منها حس بيها
ضم ايدها ومال اليها
بإبتسامة حب ليها
خد حياتها وخد عينيها
خد معانى كتيرة فيها
خد مشاعرها البريئة
روحها كانت دايبة فيه
وهو يغويها بشيطانه
كان شايفها ضعيفة بيه
وهى بتستقوى بحنانه
كان تملى يدوس عليها
وهى بتعلى بس ليه
حبها ليه كان عاميها
عن كل اللى بيعمله فيها
كانت تدعيله ويأذيها
كان يوحشها ويقسى عليها
كانت دايما تشكر فيه
يجرح يقسى ويظلم قلب
هى تسامحه وتداويه
قلبها مبقاش قادر يستحمل
وفى اخر نبضاته خلاص
وشريط حياتها يعدى عليها
كان ذنبها حبت بإخلاص
دلوقت بس حس بيها
لما ضاعت من ايديه
لما ماتت ولما فضيت الدنيا عليه
بس بعد الموت خلاص
مهما يحصل مش راجعة ليه
حس فعلا انه ضيع
قلب كان بيموت عليه
....

2014/04/14

ارتحت فى بعدك



 
كنت خلاص ارتحت فى بعدك .. 
جاى تانى بتفكرنى بيك 
خلاص دى صفحة واتقفلت 
ومهما تعمل مش هرجع ليـك

اصل انا متعلمتش بسهولة معاك 
ده انا جراحى منك خدت وقتها 
وزادت اوى عن حدّهــا
فكرك لما تقول ازيك .. هفتح صفحة قفلتها ؟!!


2014/04/13

صباح قلبك



صباح الدنيا بتضحكلى .. 
صباح قلبي  بيشتاقلك.. 
صباح قلبك بيندهلى .. 
و كل ما فيا بيحبك .. 

بشوق تندهلى واسمعلك ..
ويلمس طيفي حنان قلبك ..
وفنجان قهوة يجمعنا ..
ممرر طعمها فى غيبتك  ..

#حنان

2013/02/22

بيجيي على بالـي


..انا إللي بيجي على بالي في يوم فرحي أكون ويااه


أعيش مع قلبه لحظاته

في ضحكه وحتى وقت بكاه

انا إللي اتمنى اكون جمبه طول الوقت

لكنه عايزني على راحته اكون سايباه

ولا حتى انا هامآه

ولا دموعي دي فارقة معاه



زمان كانت دموعي غالية..

لو شافها يبوس عينى ويمسحها..

لكن دلوقت لو يلمحها .. يتزهق ومن قدامي يمشي ولا يسأل ايه سببها

انا إللي زمان كان حبه ليا يفوق الوصف والإحساس

ودلوقت انا اللي بيزهق منها من بين الناس

ومش عاوز كلام منها ولا مديها حق تحس!!

عاوزها تكون انسان آلي تنفذله مطالبه وبس ..!



لكن تقوله :واحشنى! كلمني ! ادينى من وقتك شوية!!!

كده تكون عايزة تاخده من ناسه واصحابه ..وتتسمى انانية..!

أنا إللي هاممني في حياتي أكون وياه !

وبتمناله احلى حياه

يكون هو مش طايق حتى مني الآه

ولا احزن ولا افرح ولا اكون شاغلاه.!

خلاص قلبي لا عاد يتحمل ولا قادر يعود مرساه..

خلاص قلبي في وجعه تاآه

يا إما يحس إحساسي ويعرف قد إيه بقاسي يا إما قلبي هيموت ومش هيلاقي غير ذكراه..

2013/01/14

خليكوا صغـــار

انا بحســد الأطفــال عـ إللى فى إيديهم
لا كبروا وعــرفوا إللى الـدنـيـا مخبيـآاه ليهــم
لا داقوا الجرح ولا عذاب الحب
لا عاشوا فى هم ولا حسوا بدموع القلب
لا عرفوا هموم ولا مشاكل الدنيا
إن ضـاعـت لعبــة عايزين لعبـة تانية

لسـة معرفوش ان احنا نفسنا لعبة .. بيلعب بيها ناس زينا
ويكسروها ويضيعوهـا .., ويلاقوا غيرهــا
كان نفسي أدعيلكوا بس دعــوة .. كنت اتمنى تفضلوا صغــار .

أحلامنــا



الأحــلام عالـَـم من خَـيــالنــا
مع ذلـك بيــتــعــبـنــا ,,

وبـِـنصدّق مـُجـَـرّد حـِـلـم
وهو مش أكــتـر من فيلـم

كتبنــا فى بالنــا حكايـتــه
والسعـادة تـكون نـِـهــايتـه

ونـِـصـحـى نـلاقي حاجة تانية
حـُزن ما كان على بــالنــا

بــُــعد حـَـبايبنــا عنــّـا
و فـ الحـلـم كانــوا فــ أحضَــاننّـا